Los repetíos

L’emperador d’Asturies dictamina que los drechos nun correspuenden a cada individuu, sinón a cada «unidá ontolóxica» (i.e., una persona que se clonare o dixitalizare la so consciencia namás tendría drechu a la proporción del salariu mínimu interprofesional correspondiente al númberu de copies de sigo mesmu qu’existieren; daquién con un clon namás puede cobrar mediu SMI, etcétera). Tres d’esta decisión, los habitantes del Imperiu destrúin tantes copies de sigo mesmos como pueden, asesinando a los clones (si los clones nun se adelanten y asesinen a los orixinales) o esborriando les copies informátiques de la so
consciencia que pudieren realizar. Xuacu’l repetíu, que se lleva fatal col hermanu ximielgu Cayu, pero ye mui amigu del robot qu’alberga los duplicaos de la personalidá y la memoria del hermanu, prepárase pa defender a esti robot énte un posible ataque.